«ԱՈՒԴԻՏՈՐՆԵՐԻ ՊԱԼԱՏ» հասարակական կազմակերպությունը հիմնադրվել է 2012 թվականին՝ որպես Հայաստանի Հանրապետության քաղաքացիների, օտարերկրյա պետությունների քաղաքացիների, քաղաքացիություն չունեցող անձանց և/կամ իրավաբանական անձանց հասարակական միավորում, որն ունի ոչ առևտրային կազմակերպության կարգավիճակ:
Այսօր Պալատին անդամակցում են հաշվապահական հաշվառման, իրավաբանական, փաստաբանական և խորհրդատվական ծառայություններ մատուցող տասնյակ կազմակերպություններ, գործարար համայնքի այլ (առևտրային, արտադրական և այլ) գործունեություն ծավալող 200-ից ավելի կազմակերպություններ:
Պալատը ՀՀ Ֆինանսների նախարարության Եկամուտների քաղաքականության կատարելագործման խորհրդի և ՀՀ Պետական եկամուտների կոմիտեի Եկամուտների վարչարարության կատարելագործման հասարակական խորհրդի անդամ է: Պալատը, անդամակցելով վերոնշյալ խորհուրդներին, ակտիվորեն մասնակցել և շարունակում է մասնակցել ՀՀ Հարկային օրենսգրքի, հարակից իրավական ակտերի և դրանցում կատարվող լրացումների ու փոփոխությունների իրականացման աշխատանքներին՝ որպես բիզնեսին սպառնացող կամ այն խոչնդոտող խնդիրներն օպերատիվ կերպով բարձրաձայնող և լուծման հնարավոր ուղիներ փնտրող կարևորագույն հարթակ:
Պալատը 2013 թ․ հիմնադրել է ԱՈՒԴԻՏՈՐՆԵՐԻ ՊԱԼԱՏԻՆ առընթեր մշտապես գործող «Առևտրային դատարան» արբիտրաժային հիմնարկը, որը քաղաքացիական և այլ իրավահարաբերություններոում վեճերի լուծմանը նպաստող մարմին է՝ հիմնարկի կարգավիճակով:
Պալատը 2013 թ․ հիմնադրել է նաև Պրոֆեսիոնալ հաշվապահների եվրոպական դպրոցը, որի նպատակը գործող կամ սկսնակ հաշվապահներին, ֆինանսական տնօրեններին, գործարարներին, դատահաշվապահական փորձագետներին պատրաստելն և վերապատրաստելն է: Ուրախությամբ պետք է նշենք, որ դպրոցի շրջանավարտների քանակը գերազանցում է 500-ը, որոնց գերակշիռ մասը ՀՀ-ում գործող խոշորագույն ընկերություններում զբաղեցնում են գլխավոր հաշվապահի, ֆինանսական տնօրենի, աուդիտորի, ներքին աուդիտորի, անկախ փորձագետի և այլ բարձր պաշտոններ:
Պալատն իր դուստր կազմակերպություն Դպրոցի միջոցով պարբերաբար նախաձեռնում է պրոֆեսիոնալ հաշվապահների մասնագիտական վերապատրաստման դասընթացներ, օրենսդրական-խորհրդատվական կլոր սեղան – քննարկումներ՝ այդպիսով իրականացնելով իր անդամների շարունակական մասնագիտական զարգացման առաքելությունը։